Bugun Milliy mass-mediani qo‘llab-quvvatlash va rivojlantirish jamoat fondida O‘zbekiston Energetika vaziri Jo‘rabek Mirzamahmudov OAV vakillari va blogerlar ishtirokida joriy yil 1-oktyabrdan kutilayotgan yuridik shaxslar uchun gaz va elektr energiyasi narxlarini erkinlashtirish masalasi bo‘yicha matbuot anjumani o‘tkazdi.

Vazir Navoiy, Olmaliq KMK va boshqa yirik sanoat korxonalari uchun elektr energiyasi narxi 1 kVt/soat uchun 1000 so‘mgacha, boshqa yuridik shaxslar uchun esa 900 so‘mgacha oshishini ta’kidladi. Yirik korxonalar va budjet tashkilotlari uchun gaz narxi 2,7 baravarga - bir kubometr uchun 1800 so‘mgacha oshishi ma’lum qilindi. Boshqa korxona va tashkilotlar uchun esa narx 2,3 barobarga – 1500 so‘mgacha oshiriladi.

Vazirning taʼkidlashicha, aholi uchun narxlar oʻzgarishi iste’molchilarni barqaror energiya bilan ta’minlash sharti bilan 2024-yil bahorida kuchga kirishi mumkin. Bunda 1 kVt/soat narxi 450-500 so‘m bo‘lishi rejalashtirilgan.

Jo‘rabek Mirzamahmudov, shuningdek, hozirda aholining 85 foizi oyiga 300 kVt/soatdan ko‘p bo‘lmagan elektr energiyasi iste’mol qilishini, biroq qolgan 15 foiz uy xo‘jaliklarining elektr energiyasi iste’moli yuqorida tilga olingan 85 foiz aholi bilan deyarli bir xil miqdorda ekanini ta’kidladi.